بإيدك تصنع ملحد !!!

[مصطفى طالب مصطفى]

بسم الله الرحمن الرحيم

أقيمت الصلاة وولد صغير في السن واقف في الصف، جه راجل كبير في السن شد الولد وزقه ورجعه لصف خلفي أو وقفه بين الصفوف ..

كام واحد مننا شاف أو حصل معاه الموقف ده وهو صغير؟؟!!

عارفين ده ممكن يعمل إيه في نفسية الولد الصغير اللي سايب اللعب والدنيا كلها وجاي ونفسه ينشأ في طاعة الله ويكون قلبه معلق بالمساجد؟

أحد الأخوة بيحكي أن الموقف ده حصل في العيد .. المؤذن أذن للصلاة وولد صغير في السن دخل المسجد، توضأ وجلس في الصف الأول ينتظر إقامة الصلاة، يعني الولد سايب اللعب يوم العيد وجاي للصلاة، ولما أقيمت الصلاة المؤذن نفسه هو اللي شد الولد وزقه بطريقة غير آدمية ورجعه خلف الصف الأول.

الولد وقف متضايق جداً وبدأت عينيه تدمع، والمؤذن والمصليين كلهم ولا كأن حد فيهم شايف ولا مهتم بالموقف، الولد ساب الصف والصلاة كلها ورجع يخرج من المسجد خالص، بس استنى أول ما بدأوا الصلاة، ووقف شتم بأفضع الألفاظ، وياريت شتمهم هم بس!! دا شتمهم وشتم الصلاة والمساجد والدين كله.

تفتكروا الولد ده لما يكبر هيكون إيه غير واحد ناقم على الدين والمتدينين بسبب موقف خاطئ من أشخاص غير مسئولين
قال رسول الله -صلى الله عليه وسلم- لما أفتى بعض الناس بغير علم، فتسببوا في قتل أحدهم: (قتلوه قتلهم الله، قتلوه قتلهم الله، ألا سألوا إذ جهلوا، فإنما شفاء العي -أي الجهل- السؤال)

شوفوا بقى موقف الناس دي .. وقيسوه على كلام علمائنا

قال الشيخ بن عثيمين -رحمه الله- في "الشرح الممتع" (3/4) : "إنَّ الصبيان إذا تقدَّموا إلى مكان ، فهم أحقُّ به مِن غيرهم؛ لعموم الأدلَّة على أنَّ مَن سبقَ إلى ما لم يسبق إليه أحدٌ فهو أحقُّ به ، والمساجدُ بيوتُ الله ، يستوي فيها عباد الله ، فإذا تقدَّم الصبيُّ إلى الصفِّ الأول ـ مثلاً ـ وجَلَسَ فليكنْ في مكانِه ، ولأننا لو قلنا بإزاحة الصِّبيان عن المكان الفاضل ، وجعلناهم في مكان واحد أدى ذلك إلى لَعبِهم ؛ لأنَّهم ينفردون بالصَّفِّ " انتهى .

وقال الشيخ أيضا: "يجوز أن يكون الصبيان في الصف ولو قطعوا الصف ؛ لأنهم بشر ليسوا حجراً وليسوا أعمدة , فهم لا يقطعون الصفوف , ولا يجوز لأحد أن يبعدهم من مكانهم - أيضاً - حتى ولو كانوا خلف الإمام مباشرة في الصف الأول ، فإنه لا يحل لأحد أن يبعدهم من مكانهم " "لقاء الباب المفتوح" (106/24) .

إذا كان الصبي المميز ولو كان حافظ سورة واحدة مع الفاتحة، له أن يصلي إمام حتى لو كان من المأمومين أفضل وأعلم منه، فهل نمنعه من الصلاة خلف الإمام، فضلاً عن الصف الأول ؟!

طب نتصرف إزاي لما يحصل كده قدامنا؟؟!!

للأسف صعب أننا نغير الناس الكبيرة في السن أو نفهمهم ونقنعهم بغير اللي متعودين عليه، لكن على الأقل نحاول بعد الصلاة نفهمهم، ولو سألك حد منهم إزاي هتوقف الولد في الصف قول له (صلاته صحيحة ويجوز له أنه يكون الإمام).

وتذكر قول النبي -صلى الله عليه وسلم- :من رأى منكم منكراً فليغيره بيده، فإن لم يستطع فبلسانه، فإن لم يستطع فبقلبه وهو أضعف الإيمان)

بإيدك أنك تغير أثر جهلهم

خد الولد من إيده؛ ووقفه جنبك؛ وطبطب على كتفه؛ وقول له: (جدو بيرجعك علشان خايف أنك تلعب، بس أنا واثق فيك أنك هتقف ثابت زي الرجالة)
وبعد الصلاة طبطب عليه تاني؛ وسلِّم عليه؛ واسأله عن اسمه؛ وقول له: (ما شاء الله عليك، أنت راجل علشان وقفت في الصلاة ثابت زي الرجالة؛ وربنا هيحبك)
وتذكر قول النبي -صلى الله عليه وسلم- (لئن يهدي الله بك رجلاً واحداً خير لك من حُمُرِ النعم)، وفي رواية (خير لك مما طلعت عليه الشمس)، وفي رواية (خير لك من الدنيا وما فيها).

طبعاً الكلام ده كله عن الصبي المميز المقدر لقيمة الصلاة، وحتى لو طفل صغير يقف جنب أبوه في الصف، أحسن من أنه يقف في صف مع أطفال غيره يلعبوا ويعملوا هيصة في الصلاة.

ياريت كلنا نعمل مشاركة للمنشور
كام واحد شاف أو عمل الموقع ده أو اتعمل معاه
خلونا نغيَّر باللين والإحسان للكبير والصغير
قال رسول الله -صلى الله عليه وسلم- ((من رأى منكم مُنكراً فليغيره بيده ..))

ديدات أبو إسلام وسام